BORACAY, Island — Ginapahauman eon it lokal nga gobyerno it Malay ro mga aktibidad para sa dag-unan nga Love Boracay nga magaumpisa sa Abril 24 ag magabuhay hasta it Mayo 3, 2026.
Suno kay Kathrine Licerio, tagapaghambae it Malay-Boracay Tourism Office, kinahang-ean it LGU it mahaba-haba nga preparasyon para sa mga nakataeana nga aktibidad sa sueod it sang dominggo nga ginaeauman nga pagadayuhon it libo-libong domestic ag foreign tourist.
Ro Love Boracay suno kana sa mga nagtaliwan nga dinag-on hay naghakot it libo-libong mga turista eabi eon ag summer season raya ginapatigayon.
Waea-tuo ro mga aktibidad kapin eon sa gabie nga mas kapin pang naka-attract sa atensyon it mga bisita rason nga nabutang gid sa andang bucketlist kada tyempo it summer ro isla it Boracay.
Sa raya man nga tyempo suno kay Licerio hay buhing-buhi ro mga negosyo sa isla kapin eon ro mga accommodation establishments bangud sa nagatinir gid it pilang adlaw ro mga bisita sa isla para masulit ro andang bakasyon.
