KALIBO, Aklan—Opisyal eon nga nag-umpisa ro nagkaeain-eain nga aktibidad nga ginpreparar it Malay tourism office it lokal nga gobyerno sa Love Boracay.
Una kara, naging dinapit nga bisita si Department of Tourism ukon DOT Secretary Cristina Garcia Frasco sa opening ceremony it Love Boracay.
Suno kana, sa pihak it mga hangkat nga ginpangatubang it tourism industry sa isla it Boracay halin nga temporaryo raya nga ginsarado ko dag-on 2018 ag ginsundan it haeos daywang dag-on nga pandemya nga eubus nga nagpabagsak sa tourism sector hay hara ro Boracay uman nga nagbangon ag nagta-o it pag-eaum sa tanan.
Ginpasaeamatan man nana nga sambilog imaw sa mga naging saksi sa pagbukas it Love Boracay nga siguradong magahakot it libo-libong turista kaparehas sa mga nakaangdan ko mga nagtaliwan nga dinag-on.
Apang, ro kinaeain eamang kara hay nakasentro sa pag-amlig sa kinaiya it Boracay nga ginakilaea bilang premyadong tourist beach island sa bilog nga kalibutan.
Gindayaw man nana ro mga opisyales it Aklan sa padayon nga pagpabaskog it turismo sa probinsya kon sa siin ro Boracay ro sambilog sa mga mabaskog nga nagacontribute sa ekonomiya it nasyon.
