Nagapanawagan ro pilang mga drivers and operators sa Aklan sa Department of Transportation (DOTr) ag Land Transportation Franchising and Regulatory Board (LTFRB) nga siguraduhon ro insigida ag maayos nga pagpanupod it fuel subsidy para sa mga drayber ag operator it pampublikong saeakyan, kadungan sa mabahuean nga pagtaas sa presyo it langis, epektibo adlaw it Martes.
Suno kay Rolan Uson, chairman it New Washington-Kalibo Transport Cooperative nga mag-eowas kara, hirit man nanda nga kunta hay pataasan ro pamasahe, apang indi pa sigon raya mahimo sa makaron bangud nga kinahangean nga mag-agi sa proseso antes raya nga mapatuman.
Sa makaron sigon hay gin-abisuhan eon sanda nga asikasuhon ro mga kinahangeanon nga mga requirements para sa nasambit nga subsidiya.
Kon magabuhay pa sigon ro makarondaya nga sitwasyon hay siguradong mabahoe ro magiging epekto kanda bangud nga haeos ro andang pagakitaon hay maagto eamang sa krudo.
Sa pihak kara, ginklaru nana nga owa sanda it problema sa andang pagpamasada, kundi ro sobrang kataason it presyo it langis, kun sa siin, ro pilang mga gasoline stations sa Aklan hay nagpamentaha sa sitwasyon bangud nga nag-umpisa eon nga magpatuman it oil price increase ko nagtaliwan nga domingo ag owa nagsunod sa patakaran.
Mag-eowas kara, pilang gasoline station man ro tempranong nagsarado kahapon it Lunes, antes ro implementasyon it bigtime oil price hike kaina it agahon.
