KALIBO, Aklan — Insigidang gin-transport sa sangka ospital sa Manila ro mag-asawang Chinese national matapos nga aksidenteng mabungguan ro ginasakyan nga jet ski it sambilog pang jet ski nga ginamaneho man it sangka Koreano sa kaeawran nga sakop it isla it Boracay.
Base sa report it Malay Police Station, padayun nga ginabueong makaron sa Makati Medical Center ro mag-asawang sanday Wang Bao Long, 24 ag Jun Yu Ke, 29, parehong taga-China bangud sa gin-angkon nga bali, mga nina ag gaob sa nagkaeain-eain nga parte it eawas.
Ginasugid nga hinampak it mabaskog nga humbak ro jet ski nga ginamaneho ni Sehoon Oh, 18, sangka Koreano rason nga naduea-an it kontrol ag aksidenteng nabungguan ro kasub-eang nga jet ski it mag-asawa.
Inapok sigon si Wang Bao Long nga nag-angkon it spinal cord injury.
Gindaea pa ro mga biktima sa sangka clinic sa Boracay, apang bangud sa grabeng nina hay gin-refer sa ospital sa Manila.
Samtang ro naarestong Koreano hay posibleng kasuhan it reckless imprudence resulting to physical injury and damage to property.
