Kalibo, Aklan- Sa pihak it mga lastro nga naangkon sa nagkaeain-eain nga parte it kaeawasan, bukon eon it interesado ro magmanghod nga magpasaka it kaso sa kada isaea kasunod it madinuguon nga pag-eab-anay it daywa sa sueod mismo it andang panimaeay sa Barangay Marianos sa banwa it Numancia nga natabo ko Agosto 31 it gabie.
Ginpahayag ni Police Senior Master Sargeant Felizardo Navarra Jr. it Numancia Municipal Police Station nga uwa eon ginpadayuna ro kaso matapos nga nagpamalibad ro mga victim/suspek nga sanday Argie Tayco, 37-anyos nga nakaangkon it lastro sa ueo ag abaga; ag Raffy Tayco, 34-anyos nga nakaangkon mat-a it lastro sa waea nga uyahon, ilong ag alima.
Base sa imbestigasyon it pulisya, ginpahayag ni PSMSgt. Navarra nga sangka baeay malang ro magmanghod kon sa siin nag-uli ro mga raya nga una sa idaeom it impluwensya it aeak. May nagpatunga nga mainitan nga diskusyon sa magtimbang nga parte nga maskin ro andang nanay hay inde eon sanda maawat.
Umabot sa punto nga mansig buoe ro mga raya it sanduko ag nag-eab-anay sa atubangan mismo it andang ina. Nakapangayo it bulig ro iba pang miyembro it pamilya rason nga insigidang nakaresponde ro mga katapo it Numancia Municipal Disaster Risk Reduction Management Office ag nadaea ro mga raya sa Aklan provincial hospital kon sa siin sanda sa makaron nagapabilin nga naka-confine para sa andang nagakaigong pagbueong.
