KALIBO, Aklan–Maisot ro tyansa nga makaabot sa baybayon it isla it Boracay ro maeapnagon nga oil spill nga nagtuhaw sa Naujan, Oriental Mindoro.
Raya ro ginpasiguro ni CG CDR Jansen Benjamin, tagpaghambae it Coast Guard Western Visayas matapos nga makaabot eon sa baybayon it Caluya, Antique ro nagtagas nga langis.
Bangud sa naga-iral nga Northeast monsoon ukon Amihan suno kana hay manaba ro tyansa nga makaabot it Boracay ro oil spill bangud raya hay nahamtang sa Eastern side it spill site samtang ro Semirara Island hay sa Western side maeapit sa Sulu sea.
Ginpahayag ni Benjamin nga naga-abot eon sa 25 drum it oil water ro nakolekta it mga responder sa bahin it Caluya, Antique kung siin ginabuebanta nga naga-abot eon sa napueong kilometro ro nasakop kara ag kapin sa 600 indibidwal nga maeapit sa shoreline ro naapektuhan.
Kabulig sigon nanda sa paglimpyo sa lugar ro Office of the Civil Defense, National Disaster Risk Reducation and Management Council ag lokal nga gobyerno.
Nasayuran nga kapin sa 800,000 litro it industrial fuel ro karga it nag-eugdang nga MT Princess Empress.
Nagapatigayun eon man ro PCG personnel it shoreline assessment kamana man nga nagpakalhit it assets ag equipment para ma-contain ag marekober ro nagtagas nga langis.
