KALIBO, Aklan—Ginaeauman eon it Malay Tourism Office ro mas pang pagbuhos it mga turista sa isla it Boracay sa nagahilapit nga Paskwa ag Bag-ong Dag-on.
Suno kay Malay Tourism Officer Felix Delos Santos nga sa makaron pa eamang hay buhos eon ro mga local tourists nga kaabuan hay naghalin sa national capital region ukon NCR ag Western Visayas.
Umpisa Disyembre 1 hasta 5, ro tourist arrivals hay naga abot eon sa 15,601 ukon may average nga 2,500 hasta 3,600 nga turista kada adlaw.
Dugang pa kara nga ko buean it nobyembre , nailista ro pinakamataas nga tourist arrivals makaron nga tiempo it pandemya nga naga-abot sa masobra 67,000.
Mag-eowas sa pagsunod sa health and safety protocol, ginatutukan man sigon it natungdan nga ahensiya it gobyerno ro pag-amlig it palibot agud nga madahanan ag mapabilin ro kalimpyo makaron nga naibalik eon sa normal ro dating kaanyag it Boracay.
Nauna eon nga ginpasarado ro isla ko 2018 sa sueod it an-um nga buean agud nga ipaidaeum sa paglimpyo ag rehabilitasyon matapos nga bansagan ni pangueong duterte nga cesspool ro isla.
