KALIBO, Aklan—Nagpanawagan si Malay Tourism Officer Felix Delos Santos sa mga pumueuyung Aklanon ag iba pang pamunuan it tourist destination sa Pilipinas nga magbueuligan nga uman nga makabangon ag mapabaskog ro turismo sa nasyon.
Raya hay sa atubang it gina-alegar nga mga pagpanamad sa Boracay.
Suno kana nga may mga Aklanon ag mismong mga taga banwa it Malay nga may hurisdiksyon sa isla ro naga-post sa social media it mga negatibong mensahe nga nagatuga it kasamaran sa imahe it Boracay.
Ginhalimbawa nana ro gin post it sangka netizen nga nagapahayag nga owa eon it haeos nagasueod nga turista sa Boracay bangud sa instrikto nga mga sueundanan, maabu nga mga bintana ro gina-agyan ag ginabayaran, maabu nga mga requirements, mahaba nga pila sa jetty port ag iba pa.
Apang kon pagabasehan sigon ro tourist arrivals ag mga pagkilaea sa isla bilang pang-10 sa world’s best beaches hay makabig nga owa it basehan ro andang mga komento.
Sa pihak nga parte, nagakasubo man sigon imaw bangud nga may pilang tourist destination sa pilipinas nga pilit nga ginasamaran ro Boracay agud nga mapa-angat ag makilaea ro andang lugar.
Laygay nana nga duea-on eon ro “crab mentality” nga sa baylo nga magbieirahan paubos hay magbueuligan bilang mga Pilipino.
Mas kinahangean sigon makaron it LGU Malay ag tourism stakeholders ro suporta kadungan ro apela sa publiko nga likawan ro anuman nga makasamad sa imahe it isla partikular ro pag-share it mga videos ukon komento nga owa it nagakaigo nga pruweba.
