Positibo gihapon ro lokal nga gobyerno it Malay nga maabot ro target tourist arrival nga 2.1 milyon makaron nga dag-on sa isla it Boracay.
Raya hay maskin nga nakalista it manaba nga tourist arrival sa mga nagtaliwan nga buean apang uwa gihapon nadueaan it pag-eaum ro LGU nga maabot ro punterya nga numero.
Suno kay Kathrine Licerio, tagapaghambae it Malay Tourism Office nga hasta ko Nobyembre 28 hay nakalista eon it kabilugan nga 1,870,069 tourist arrival kon sa siin kinahang-ean pa it masobra sa 230,000 tourist agud nga maabot ro target nga 2.1 milyon hasta sa matapos ro presenteng dag-on.
Para maabot ro nasambit nga numero hay kinahang-ean ro kapin sa pitong libong turista nga magabisita sa Boracay kada adlaw ag positibo sanda nga matabo raya makaron nga buean it Disyembre sa tyempo it paskwa.
Samtang sa pihak nga parte, ginkalipay it nasambit nga taeatapan ro uman nga pagkilaea sa Boracay bilang World’s Leading Luxury Island Destination sa World Travel Awards Grand Final Gala Ceremony nga ginpatigayon ko Nobyembre 24 sa Savoy Palace, Madeira, Portugal.
Ro makasaysayang pagkilaea hay kasunod it nauna eon kara nga kadaeag-an bilang Asia’s Leading Luxury Island Destination ko Asia and Oceania Gala Ceremony sa City of Dreams, Maynila ko Setyembre 3, 2024.
Gin-eampasan it Boracay ro mga kilaeang nominado kaparehas it Jersey, Mustique, St. Vincent and the Grenadines, ag The Bahamas nga kapin pang nagpalig-on sa posisyon kara bilang nagapangunang destinasyon para sa mga luxury travelers sa bilog nga kalibutan.
