NATIONAL News — Naga-abang ro Anti-Money Laundering Council (AMLC) sa igasumiteng request it International Criminal Court (ICC) para i-freeze ro mga propiyedad ni dating Pangueong Rodrigo “Digong” Duterte.
Sa pihak it pahayag ni ICC Spokesman Fadi El Abdallah nga posibleng ipaguwa it ICC anumang oras ro freeze order sa mga propiyedad ni Duterte, ginmitlang it AMLC nga owa pa sanda it nabaton nga request.
Ginpaathag ni AMLC Executive Director Matthew David nga kun mag-request ro ICC, paga-usisaon raya it andang taeatapan ag igakonsulta sa ibang ahensiya it gobyerno kun ano ro magiging sabat it Philippine government.
Samtang, ginklaru man ni Palace Press Officer Atty. Claire Castro nga owa pa it kasiguraduhan nga makikipagbueuligan ro gobyerno sa ICC kon magpaguwa it freeze order para sa mga propiyedad it dating pangueo.
“There is no commitment on our part, on the part of the administration if we will comply with any order issued by the ICC considering that the ICC as of the moment has no jurisdiction over the Philippines,” pahayag ni Castro.
Angot man sa pag-engganyo it ICC nga uman nga magpa-miyembro ro Pilipinas, ginpahayag ni Castro nga yuhum eamang ro sabat ni Pangueong Ferdinand “Bongbong” Marcos Jr. matapos kutan-on angot kara.
Ginpahayag ni Castro nga owa naistoryahan sa Palasyo ro posibilidad nga uman nga magpa-miyembro ro Pilipinas sa ICC matapos nga mag-withdraw ro gobyerno ko tiempo ni dating Pangueong Duterte.
