KALIBO, Aklan—Bilang kaparte it inisyatibong itaguyod ro Muslim-friendly tourism, gin-inagurahan it Department of Tourism (DOT), lokal nga gobyerno it Malay, Megaworld Hotels & Resorts (MHR) ag iba pang Halal ag Muslim stakeholders ro Marhaba Boracay, adlaw it Martes, Setyembre 10.
Raya hay sangka kauna-unahang Muslim-friendly cove sa Boracay nga nagatuyong magserbe sa mga Muslim nga pamilya ag travellers.
Ro Marhaba Boracay hay makit-an sa Boracay Newcoast Area it Megaworld Hotels and Resorts ag may disenyo nga ginbuoe sa iba pang Muslim-friendly beaches sa Maldives ag Thailand.
Ginakabig raya nga sangka “special-use area” nga ginakonsidera ro mga laye it Islamiko.
Ro paglunsar kara hay kaparte it pagtinguha it DOT sa idaeom it administrasyon ni Pangueong Ferdinand R. Marcos, Jr. nga iduso ro Halal ag Muslim-friendly tourism sa nasyon.
Ro nasambit nga seremonya hay ginpanguhana ni DOT Secretary Christina Garcia Frasco, kaibahan si Mayor Frolibar Bautista it Malay, ag iba pang opisyal kaparehas it Malaysian Ambassador sa Pilipinas nga si Dato Abdul Malik Melvin Castelino, ag Brunei Ambassador sa Pilipinas nga si Megawati Dato Paduka Haji Manan.
Kaibahan man ro mga opisyal it Bangsamoro Autonomous Region in Muslim Mindanao (BARMM) nga ginapamunuan ni Minister Abu Amri Taddik, mga miyembro it Boracay Muslim Community (BMC), ag mga representante maghalin sa Megaworld Hotels and Resorts.
