Ginasueong ni Senator Robinhood Padilla ro mas mabug-at nga penalidad kontra sa mga government personnel nga mapamatud-an nga nagapinuril ukon nagahimo it pekeng ebidensya sa congressional hearing.
Sa Senate Bill No. 610 ukon “Truthful Congressional Inquiry Act,” pwedeng makulong it hasta sa 10 dag-on ro sin-o man nga government employee nga mapamatud-an nga nagapinuril ukon naga-imbento ukon nagapeke it ebidensya sa sangka congressional inquiry.
Posible man nga mag-abot sa 20 anyos ro pagka-kulong kun ro maga-eabag hay kaibahan sa Armed Forces of the Philippines, Philippine National Police, Philippine Coast Guard, Bureau of Fire Protection, Bureau of Jail Management and Penology, Bureau of Corrections, National Bureau of Investigation, Philippine Drug Enforcement Agency ag iba pang law enforcement agencies.
Sakop man it mas mabug-at nga penalidad ro mga tawuhan it Bureau of Immigration and Deportation, Bureau of Internal Revenue ag Bureau of Customs.
Suno kay Padilla, importanteng mapabilin nga mataas ro sueundanan it kamatuoran ag saeabton bangud nga ro public office hay public trust.
Samtang, nagdihon man ro senador it Senate Bill No. 1957 nga nagatuyo nga penahan ro mga tawong nagatau it saea ukon pekeng address kon ginapadaehan it subpoena.
Sa idaeum it proposisyon, pwedeng makulong it 6 nga buean hasta daywang dag-on ag multa nga P100,000 hasta P300,000 ro sin-o man nga subpoenaed individual nga hungod nga magatau it saea nga address.
