KALIBO, AKLAN — Ginpasuspinde it Office of the Ombudsman si Mayor Denny Refol it banwa it Altavas sa sueod it an-um nga buean bangod sa imoralidad.
Suno sa Ombudsman, guilty sa Disgraceful and Immoral Conduct si Altavas Mayor Refol base eon man sa ginpatigayong fact-finding investigation it Public Assistance and Corruption Prevention Office of the Ombudsman Visayas.
Natumod nga nag-angkon it relasyon ag unga si Refol sa ibang babaye apisar nga kasae pa raya, base sa ginlunsar nga preliminary investigation.
Makapamatuod kara rong live birth it nasambitan nga unga nga natawo ku dag-on 2007.
Dumipensa man si Refol sa paghambae nga sa makaron sigon hay pila eamang ka public official ro uwa it kabit.
Gin-insister man kara nga uwa eon imaw nakikipagkita sa kabit kara.
Samtang, sa pagsekyar it Bombo Radyo Kalibo kay Refol, nag-ayo anay raya it oras nga magtao it dugang pa gid nga komento angot sa nasambitan nga isyu.
Ginmanduan it Ombudsman ro Department of the Interior and Local Government nga i-implemantar ro nasambitan nga suspension.
