KALIBO, Aklan—Eubos ro pagkanugon it mga pilang ka mga residente sa andang alaga nga kasapatan matapos salakayon it ginasugid nga mabahoe nga ayam nga kulay itom sa Brgy. Taba-ao, Banga.
Suno sa sambilog sa mga nabiktima nga si Randy Retubis nga pasado alas-12 it tungang gabi-i ko adlaw it Biyernes kat mabugtawan imaw matapos nga magkriar it sangag ro anang mga alagang manok.
Gilayon sigon nana nga gin-adtunan ro mga raya para tan-awun kung siin dikato nana nakit-an ro sangka mabahoe nga ayam nga naga-salakay sa anang mga alaga.
Bangud kara, madasig sigon imaw nga nagbuoe it kahoy para bunaeon ro sapat apang madasig raya nga naka-paeagiw.
Naga-linibot eamang sigon raya ag nagakaduea sa dueom.
Bandang alas-2:30 it aga-aga sigon kat uman raya nga nagbalik.
Haeos naubos it pamatay it nasambit nga sapat ro anang mga alagang manok nga ginakaeakipan it mus-an, isiw ag agak kamana man ro daywang rabbit nga gina-alagaan it anang igmanghod.
Mag-eowas kay Randy, naka-eksperyensya man it kaparehong hitabo ro pila sa anang mga kaeapit-baeay kung siin pati ro bag-ong tiyo nga kanding hay natigayon man nga mapatay.
Raya sigon ro kauna-unahan nga kahigayunan nga gin-atake ro andang lugar it masyadong mabangis nga klase it ayam.
