KALIBO, Aklan—Imbes nga ibalik sa dating pamasahe nga 12 to 14 pesos halin Kalibo paagto it Banga vice versa, ginaduso it mga drivers nga obrahon sa 20 pesos ro andang regular nga pamasahe ag magatau it discount nga limang piso sa mga estudyante, senior citizens ag PWDs.
Raya ro ginpahayag ni Leandro Lenciano, chairman it Banga-Kalibo Jeepney Transport Service Incorporated.
Suno kana nga bukon sanda it pabor sa suhestiyon ni Land Transportation Office head Engr. Marlon Velez nga obrahon nga 100% ro seating capacity ag ibalik eon sa dati ro pamasahe.
Mas gusto sigon nanda nga sundon ro ginpaguwa nga executive order ni aklan governor florencio miraflores nga 70% seating capacity ag magasukot eon lang it 20 pesos nga pamasahe halin sa dating 30 pesos.
Gin-insister ni Lenciano nga owa eon haeos sanda it ginakita eabi pa ag nagapabilin nga mataas ro presyo it produktong petrolyo.
Ro 70% nga seating capacity it mga PUJ suno kana hay ginaeakipan it 13 nga pasahero, 11 halin sa terminal ag daywa ro paga-pick-apon sa daean.
Ro bag-ong panueuktan hay magiging epektibo sa Lunes, Nobyembre 29.
Bukas man sigon sanda nga makipag-hinun-anon sa andang mga pasahero agud nga mapaathag ro andang sitwasyon.
Samtang, makarondaya man ro planong igapatuman nga patakaran it mga drivers sa parte it New Washington-kalibo nga rota.
