KALIBO, Aklan— Nagpaguwa it complaint hotline ro lokal nga gobyerno it Malay para sa mga tricycle ag E-trike drivers bangud sa mga reklamong nababaton nanda halin sa mga pasahero.
Ro nasambitang mandato hay ginpaguwa ni Acting Malay Mayor Abram Sualog bangud nasayuran nga nagapili it pasahero ro pilang mga drivers sa isla it Boracay.
Ginpahayag nga masaming nababaton nandang mga reklamo hay ginauna sigon it mga drivers ro foreign tourist ag ginabalibaran ro mga residente ag trabahador.
Pahayag pa it opisyal, kat sarado ro isla hay ro mga tricycle drivers ro nagapaeapit para magpasakay apang kat ginbuksan it uman ro isla sa publiko ko Oktubre 26 hay nagbalik sa dating gawi ro mga drivers.
Bangud kara, naalarma si Sualog ag bilang aksyon agud nga mataw-an it leksyon ro mga pasaway nga drivers, ginapadasig nanda ro paghimo it LGU Malay Transportation Assistance FB Page ag Hotline agud nga may mapaabutan it mga reklamo.
Ginpahayag dugang nga kon sin-o man ro madakpan ag mapamatud-ang uwa nagapasakay it pasahero hay pagapamultahon it kapin sa P2,500.
Gin-abisuhan man kara ro publiko nga maging responsable ag makipagbuligan agud nga matapna ro kaparehas kara nga pag=inugali it mga driver sa isla it Boracay.
