KALIBO, Aklan—Naga-abot eon sa masobra sa 160 ro mga dumueuong nga turista nga nagbakasyon sa Isla it Boracay.
Raya hay matapos nga buksan it gobyerno ro borders it Pilipinas para sa international travelers halin sa visa-free countries.
Suno kay Malay Tourism Officer Felix delos Santos, umpisa Pebrero 12 hasta 20 hay may kabilugan nga 165 nga dumueuong nga turista eon ro nagsueod sa isla.
Kaabuan sigon sa mga foreign tourists hay naghalin sa Estados Unidos nga may 65; United Kingdom nga may 15 ag Germany nga may 13.
Pila pa sa mga nag-abot nga turista hay naghalin sa Australia, South Korea, Belgium, Canada, Norway, France, Sweden, China, Ireland, Switzerland, Hong Kong, Turkey, Japan, Mexico, Saudi Arabia, Netherlands, Poland, Turkey, United Arab Emirates, ag Kuwait.
Dugang pa ni delos Santos, tanan nga mga nagasueod nga turista sa isla hay fully vaccinated ag nakakasunod sa mga gintaeana nga rekisitos it gobyerno.
Samtang, kaeabanan nga nagasueod nga domestic tourists sa Boracay hay naghalin sa National Capital Region nga naga-abot sa 22,230 halin sa kabilugan nga 47,582 sa kaparehong petsa.
Sa makaron hay owa pa it international flights halin sa South Korea, Taiwan, ag mainland China ro nag-abot sa Kalibo International Airport umpisa nga ginpasugtan ro foreign travelers ko Pebrero 10.
