KALIBO, Aklan—Sa tunga it kawad-an it mga turista tuga it ginapatuman nga enhanced community quarantine sa bilog nga probinsiya it Aklan, uman nga nataeupangdan ro mga madamoe nga green algae ukon eumot sa bibi it baybayon sa isla it Boracay.
Kat ginpaidaeum sa an-um nga buean nga paglimpyo ag rehabilitasyon ro isla ko 2018, gin-insister it mga eksperto nga ro eumot ro sambilog sa mga indikasyon nga kontaminado ro baybayon bangud sa mataas nga nitrate content nga peligroso sa mga aquatic resources kamana man sa mga nagapaligos nga mga turista ag residente.
Ginapatihan nga ro owa na-treat nga wastewater halin sa informal settlers ag mga establisimento komersiyal nga owa it waste treatment facilities ro kabangdanan it pag-abu it mga eumot.
Apang ginpamilit it mga tumandok sa Boracay nga ro pagguwa it eumot hay senyales nga nag-abot eon ro summer season sa isla.
Ginapatihan nga raya hay natural phenomenon ag owa it kahilabtanan sa water pollution.
Ginasugid pa nga raya ro nagapa-puti sa baeas sa Boracay.
Sa pihak kara, ginpahayag it mga residente nga sambilog sa mga manami nga hitabu samtang naka-ECQ hay eubus pa nga makapahuway ro isla agud nga uman nga maibalik ro anang dating kaanyag nga ginabalik-balikan it mga turista, mapa-lokal man ukon dumueuong.
Nagaeaum man ro mga negosyante nga matapos eon ro krisis sa coronavirus disease ukon COVID-19 agud nga mabawi eon ro travel restrictions ag makapatigayon eon it summer excursion ro mga pumueuyu sa isla.
