KALIBO, Aklan — Gina-imbestigahan eon it pulisya ro misteryosong pagkaduea it mga nakabuead nga underwear it babaye sa pilang boarding houses sa Kalibo, Aklan.
Suno sa sangka daeaga nga nagpamalibad nga magpamitlang it pangaean nga daywang panty nga nakaputos it plastic bag ro napueot it anang ina sa guwa it andang baeay.
Sa nakapueupot nga panty, gin-igpit ro sangka papel nga may nakasueat nga bastos nga mensahe.
Dugang pa it daeaga nga eubus sanda nga naalarma bangud nga nakabutang sa mensahe it owa nakilaeang suspek nga ginapantasiya nana ro mga babaye nga naga-istar sa andang baeay nga sa pagtantiya sigon kara hay puro mga owa pa it experiensiya sa sex ukon virgin pa.
Nasayuran nga bukon eamang it sanda ro naduea-an it nakabuead nga panty kundi sa iba pang boarding houses sa nasambit nga kalye.
Ginatumod pa it Kalibo Police Station kun sin-o ro responsabli sa pagpanakaw it mga underwear sa nasambit nga lugar.
