KALIBO, Aklan–Padayun nga nagatinaas ro mga nailistang insidente it Asian Hate Crimes sa pilang ka mga daeagkuan nga siyudad ag estado sa Amerika.
Suno kay Bombo International Correspondent Greg Aguilar it California, USA, kaeabanan sa mga biktima it hate crimes hay ro mga bag-o pa eamang sa lugar ukon mga bakasyunista.
Dapat suno kana nga siguraduhon it sangka indibidwal nga kabisado ro paga-adtunan ag likawan ro pilang lugar nga eapnaag ro pagpang-atake sa mga Asyano.
Masami sigon nga gina-sakit it mga suspek ro senior citizen nga naga-isaeahanon nga nagapanaw rason nga dapat nga may kaibahan kung sa guwa it panimaeay ag indi eon magpanaw it gabi-i.
Sa makaron, nagahimo sigon it mga pamaagi ro pilang Filipino Community sa Amerika pinaagi sa pag-edukar sa mga turistang Asyano para malikawan ro insidente it hate crimes.
