Kalibo Aklan ——–Eubus ro kalipay it mga musikero sa Isla it Boracay matapos nga amat-amat eon nga nagabuhos ro mga turista partikular ko Semana Santa .
Suno kay Mike Deniega, representante it grupo it mga musikero sa Isla nga may pila pa sanda nga mga kaibahan nga owa pa nakabalik matapos nga sarado pa ro andang establisimento nga ginatukaran.
Pila sigon sa mga bars and restaurants hay nalugi bangud sa pagsarado it negosyo tuga it COVID 19 pandemic .
Samtang, gindugang pa ni Deniega nga masyadong instrikto makaron ro LGU-Malay sa pagpatuman it andang mga patakaran eabi eon ro pagtukar nanda sa front beach.
Angot kara , hugut sa gihapon nga ginapatuman it management ro minimum health and safety protocol .
Maskin nga owa eon it curfew , ginapundo eon nanda ro pagtukar pasado alas 12 it tungang gabi-e agud nga mataw-an it kahigayunan ro mga bisita nga makapahuway .
Samtang, pabor man suno kana imaw sa pagtaeana it carrying capacity agud nga maamligan ro palibot ag mapabilin ro kalimpyo it Isla .
Nagaeaum sanda nga makabawi eon matapos nga matengga sigon it pilang dag-on eun umpisa nga nagpatuman it nagkaeain eain nga quarantine classification sa probinsiya it Aklan bangud sa COVID-19 pandemic.
