KALIBO, Aklan—Sa tunga it paeag it coronavirus disease ukon COVID-19, makaangkon it adjustments sa pilang nakasanayan nga practice sa sueod it simbahan bilang kaparte it pagtapna sa pagkalhit it makamaeatay nga sakit.
Raya ro ginpahayag ni Bishop Jose Corazon Talaoc, Diocese of Kalibo sandig sa ginpaguwa nga circular it Catholic Bishops’ Conference of the Philippines ukon CBCP.
Ginklaru ni Bishop Talaoc nga owa nanda ginabayluhan ro mga tradisyon it simbahan apang nagapatigayon it “temporary precautions” sa tunga it nagatinaas nga kaso it COVID-19 sa Pilipinas.
Ginalaygayan kara ro mga pumueuyu nga maeain ro pamatyag nga indi anay magsimba ukon magtambong sa mga misa.
Gin-abisuhan man ro mga kaparian nga magsunod sa hygiene protocol it Department of Health kapareho it nagakaigo nga paghugas it alima ag paglikaw sa body contact.
Ginamanduan man sigon nga i-disinfect ro simbahan pagkatapos it kada misa ag magbutang it hand sanitizers sa pwertahan it mga simbahan para sa mga nagasimba.
Ro pagkalawat man sigon hay dapat nga ipaagi sa alima.
Mag-eowas kara ro mga ministers nga nagatau it kalawat hay required nga magsuksok it face masks bilang proteksyon sa parehong nagakalawat ag nagatau it kalawat.
Indi man anay pagbutangan it holy water sa prente ag ginpadumdum ro publiko nga likawan anay ro pagharu ag pagbuyot sa mga sagradong imahe ag estatwa.
Sa pihak nga parte, ro pagkumpisar hay dapat man nga himuon sa kumpisaryo nga may tela nga nagaprotekta sa tunga it grill.
Bangud nga pwede man nga maipasa ro virus sa mga kwarta, ginalaygayan it CBCP ro publiko nga indi pag-ipasa-pasa ro collection bag sa baylu hay buytan eamang raya it collectors.
Gin-engganyo man ni Bishop Talaoc ro tanan nga padayun nga magpangadi it Oratio Imperata agud nga matapos eon ro pandemic.
Madumduman nga nauna eon nga nagdeklara si President Rodrigo Duterte it state of public health emergency tuga it nagatinaas nga numero it kumpirmadong kaso it COVID-19.
