NEWS Analysis — Nabutang eon man sa kahuy-anan ro linya it Philippine National Police (PNP) bangud sa pilang bulok, kapalmuks ag owa it konsensyang pulis.
Na-hulicam ro gin-obra nga pagsueod it limang pulis nga puro mga nakasibilyan sa sangka computer shop.
Kapareho it mga naunang insidente it hulidap ro natabu.
Paga akusahan ro negosyante nga eakot sa ilegal nga hilimuon, pagahadlukon ag pagkatapos hay pagaboe-an it kwarta agud nga indi pagkasuhan ukon ireklamo.
Ro grabe kara sa ulihing kaso, owa eang basta gin ubos ro kita it computer shop, may bilin pa sa tag-ana nga magtau it P4,000 pesos nga kada domingo nga ‘proteksyon’.
Oeobrahon ayhan raya it matinong pulis?
May mga bulok gihapon nga ‘kamatis’ sa PNP.
Sa makaron hay ginapatugis eon ni PNP Chief General Benjamin Acorda, Jr. ro limang pulis-Maynila nga eakot sa robbery-extortion.
Ginmanduan eon ro Manila Police District, PNP-Intelligence Group ag Criminal Investigation and Detection Group para usuyon ro lima.
Angot kara, ginsabak eon ro tanan nga mga naka assign sa Manila Police District Intelligence Operations Unit bangud sa insidente.
Makasueubo nga ro mga ginaeauman nga tagapatuman it laye hay sanda pa ro naga eabag.
Paalin nga nakakaeusot ro mga makarondaya nga klase it mga pulis?
Siin ag kanyo ayhan sanda nga nagahugot it kabaskog it buot ag kadamoe it uyahon agud nga mag obra it ilegal nga hilimuon.
Rason nga ro hangkat sa pinuno it kapulisan, limpyuhan ro andang linya , pahalinon eon ro mga bulok antes pa nga makatapon it iba.
