Kalibo Aklan ———Naka-work from home makaron ro mga school based personnel nga ginakaeakipan it mga school heads ag mga manugturo sa tunga it pakikipagsukoe sa 2019 coronavirus disease (COVID-19) pandemic.
Suno kay Asst. Schools Division Supt. Jose Niro Nillasca it DepEd-Aklan, maskin nakabakasyon ro mga manugturo hay obligado gihapon ro mga raya nga makipagbahin sa mga discussion engkaso nga may mga instructions kanda kaangot sa ginahimo nga preparasyon para sa school year 2020-2021.
Sa division office suno kay Nillasca hay naka-skeleton work force ro mga empleyado bilang pagsunod sa ginapatuman nga social distancing bangud nga may mga transactions nga inde pwede mapaiway maskin una pa sa idaeom it General Community Quarantine (GCQ) ro bilog nga probinsya it Aklan.
Agud nga malimitahan ro andang kliyente, may nakataeana nga sangka personnel kada distrito nga imaw eamang ro allowed nga magpadueong sa division office para sa tanan nga kinahang-eanon it sangka school district.
Samtang sa pihak nga parte, uwa pa sigon it klaro kon anu ro eksaktong buean nga magabukas ro klase para sa school year 2020-2021.
Suno kay Nillasca, kon pagasundon ro school calendar hay sa ikatlong Lunes it Hunyo hay maga-umpisa eon ro regular class apang bangud sa pandemya hay ginaduso it DepEd sa Inter Agency Task Force on Emerging Infectious Disease (IATF-EID) nga igapatigayon eon lang sa buean it Agosto ro school opening.
Apang, bukon pa sigon raya it aprubado rason nga uwa pa it kongkretong buean ag petsa kon san-o mabukas ro klase sa tanan nga pampubliko ag pribadong eskwelahan sa nasyon.
May kaangtanan kara, gin-engganyo ni Nillasca ro mga ginikanan nga giyahan ro andang mga onga nga magfocus sa DepEd Commons Educational Materials mintras nagatinir sa andang tagsa nanda ka panimaeay.
Ro DepEd Commons hay sangka website kon sa siin makabueo ro mga public school teachers, maging ro mga ginikanan it mga libreng educational resources para sa mga ongang kinder hasta it Grade 10.
Sa makarundaya nga pamaagi hay magkaantiguhan gihapon ro mga estudyante maskin una sa tagsa nanda ka panimaeay.
