Kalibo Aklan ———-Gin-abisuhan it lokal nga gobyerno it Aklan ro mga turista nga nagapa-Boracay nga magsumite eagi it andang aplikasyon para sa QR codes, kapin sa 24 oras antes ro andang flight.
Raya hay matapos nga nagka-aberya ro andang sistema nga naga-isyu it QR codes sa mga bisita ko Martes, Nobyembre 16 bangud sa pagbuhos it mga turista sa Isla.
Ginkumpirma ni Atty. Selwyn Ibaretta, provincial administrator nga nakabaton sanda it mga balita angot sa mga na-stranded nga mga turista sa Ninoy Aquino International Airport matapos nga mapas-eawan nga makabo-oe it required nga QR code agud nga makasakay sa eroplano paagto sa caticlan airport .
Ginpahayag ni Atty Ibaretta nga kinueang sanda it mga validators.
Sa haeos 20 nga mga empleyado nga naga-proseso it tourist applications, siyam eamang ro nagsueod ko November 16.
Apang insigida sigon raya nga nasolusyunan pagka-aga pinaagi sa pagbo-oe it andang mga kabueos.
Sa makaron hay naga abot sa 1,000 hasta 1,500 nga aplikasyon ro andang gina proseso kada adlaw para sa QR code.
Ro QR code sigon ro ginagamit agud nga madali nga ma-trace ro tanan nga mga turistang nagasueod sa Boracay.
Nasayuran nga bumuhos ro mga turista ko Nobyembre 16 matapos nga gin-anunsyo ni Aklan Governor Florencio Miraflores nga ginaduea eon ro RT-PCR test sa tanan nga mga fully vaccinated nga turista.
Ro mga naka-first dose pa eamang it bakuna hay obligado sa gihapon nga magsumite it negatibong resulta it swab test.
Sangka turista nga nagahingangean kay Lenmar Davidon halin sa Bacolod City ro agaw-atensyon matapos nga mag post sa anang social media it tarpaulin nga anang ginabuytan kun sa siin makita ro naka print nga kopya it anang QR code.
Sa pihak nga parte, base sa record it malay tourism office, umpisa Nobyembre 1 hasta 14, 2021, ro tourist arrivals hay nag abot sa 24,355.
Haeos katunga kara hay naghalin sa National Capital Region.
