KALIBO, Aklan— Ginaimbestigahan eon it Sangguniang Panlalawigan it Aklan ro mga report nga may mga undocumented nga dumueoong nga mga Chinese workers nga naga-istar ag nagatrabaho sa Aklan ag isla it Boracay.
Suno kay SP member Nemesio Neron, kadungan it uman nga pagbukas it Boracay sa publiko ko Oktubre 26, nagkalhit ro mga dumueoong nga nagatrabaho bilang mga tour commissioners, interpreters, operators ukon tour guides sa isla.
Katuyuan it nasambitang imbestigasyon nga mapangalagaan ro interes it mga trabahador nga Pinoy ag malikawan ro overpopulation sa isla nga dati eon nga naging problema.
May pilang establisyemento eon sigon ro mas prayoridad nga mataw-an it trabaho ro mga dumueoong kaysa mga Pilipino.
Nasayuran nga ko buean it Marso antes ipasarado ro Boracay hay nagpatigayon it imbestigasyon ro provincial board sa naga-inabo nga numero it mga dumueoong nga iligal nga nagatrabaho ag may negosyo sa Aklan kaparehas it mga Chinese ag mga Koreano.
Paga-usisaon man nanda kon may pag-eabag ro mga raya sa laye it immigration.
