KALIBO, Aklan–Ginkumpirma it Cantilleros Corporation nga dating GM’s Tours nga kaibahan sanda nga mga van drivers and operators nga nag-apply para sa PUV Modernization Program.
Suno kay Johnny Aranas, sambilog sa mga miyembro it korporasyon nga haeos tanan nanda nga masobra sa 40 nga units hay natigayon eon nga ma-consolidate sa idaeum it nasambit nga korporasyon nga may rotang Roxas-Kalibo ag Caticlan-Kalibo vice versa.
Apang nagakabaeaka sigon sanda sa andang sitwasyon kon masarangan nga bayaran ro bag-ong unit it PUV nga minilyon ro kantidad pinaagi sa pagpamasada eamang eabi pa ag maabu sigon sanda nga kakompetensiya.
Ginpamilit ni Aranas nga masyadong kueang ro andang ginakita adlaw adlaw agud nga makabayad it utang ro mga drivers ag operators.
Sa makaron, ro Landbank ag Development Bank of the Philippines hay ginapasugtan ro borrower nga makautang it hasta sa 95 percent it kabilugan nga kantidad it public utility jeepney nga may 6% interest rate per annum ag payable ukon pwedeng mabayaran sa sueod eang it pitong dag-on.
Ginaduso suno kana it gobyerno ro pagbilog it mga kooperatiba agud nga masabat ro pinansyal nga paeas-anon it mga drivers ag operators nga magabaylo it andang mga saeakyan.
Pasakit pa sigon kanda ro presenteng presyo it produktong petrolyo rason nga kinahangean nga tun-an anay it uman ro programa bangud sa mataas nga presyo it amortization it modern jeeps.
Sa makaron hay uman nga gin-extend it LTFRB sa disyembre 31 ro palugit para sa mga tradisyunal nga PUV partikular ro jeepney agud nga mataw-an it kahigayunan nga makapasakop sa andang natungdan nga kooperatiba ukon korporasyon.
