KALIBO, Aklan—Matapos ro madinaeag-on nga mobile blood donation program sa covered court it Brgy. Polo, New Washington, ginpahayag ni Dr. Beatriz Diel it Philippine Red Cross Aklan nga sigidas ro andang kapareho aktibidad makaron nga buean it Hulyo nga makabig nga National Blood Donors Month.
Suno kana nga masyado makaron nga manaba ro supply it dugo sa Aklan tuga it coronavirus pandemic.
Bangud sigon sa paeag it COVID-19, owa it masyadong naga-agto sa opisina it PRC agud nga mag-donate it dugo ag maabu man nga blood donation ro na-postpone bangud sa community quarantine.
Sa ginpatigayon nga bloodletting activity, hugut nga ginpatuman ro health protocols kapareho it pag-disinfect ag physical distancing.
Samtang, gindugang pa ni Dr. Diel nga mabahoe ro papel nga ginabuytan it Philippine Red Cross sa pag-supply it dugo eabi eon sa mga ospital.
Ro PRC-Aklan suno kana hay makabig eamang nga blood collecting unit, kun sa siin, ro pag-proseso kara hay ginapatigayon sa Roxas City.
Ro Aklan Provincial hospital hay may kaugalingon nga blood bank.
Sa pihak nga parte, pwede sigon nga maka-donate it dugo ro sangka indibidwal kada tatlong buean.
Dugang pa ni Dr. Diel nga kon mabahoe ro maibulig it blood donation sa mga nagakinahangean bangud nga sarang raya nga makasalbar it kabuhi, maabu man nga benepisyong medical ro mga indibidwal nga nagatau it andang hamili nga dugo.
