Tinamaan ro Moscow it ginakabig nga pinakamabahoe nga drone attack halin kat mag-umpisa ro full-scale war it Russia ag Ukraine, kun siin kapin sa 200 drone ro nareport nga tumarget sa mga lugar sa palibot it kabisera.
Suno sa mga awtoridad, 17 katawo ro naninahan bangud sa mga pag-atake nga nagtuga it mga mabahoe nga sunog, madamoe nga aso, ag kahalitan sa pilang imprastraktura kaibahan ro oil depot ag residential areas.
Ginpahayag it Russia nga naka-intercept ag nakasamad sanda haeos 1,000 drone ag ap-at nga cruise missile sa sueod it 24 oras sa nagkaeain-eain nga parte it nasyon, samtang sangka tawo ro namatay sa Rostov region matapos tamaan ro sangka oil facility.
Tinamaan man ro Kapotnya refinery sa Moscow sa pangatlong beses sa sueod it sang buean, nga nagtuga it maeapnagon nga sunog, pagbakwit it mga residente, ag temporaryong pagsarado it ap-at nga paeuaparan.
Suno sa Ukraine, parte it “long-range sanctions” ro mga pag-atake bilang sabat sa naunang Russian strikes sa Kyiv, samtang nagapadayon ro baeayluhan it opensiba it magtimbang nga bahin.
Uwa pa it pahayag si Russian President Vladimir Putin angot it insidente.
