POLICE Report — Patay ro sangka babaye nga 7 buean nga nabdos samtang naninahan mat’a ro anang mister ag 11-month old nga eapsag matapos nga maatrasan it dump truck ro andang ginasakyan nga motorsiklo sa Cebu, City.
Nakilaea ro namatay nga si Rothchell Hernani, samtang ro anang naninahan nga mister hay si Juan Secretaria, 29, driver it motorsiklo, ag andang unga nga si Nathan, puro mga residente it Sitio Dakit, Brgy. Cambang-ug, Toledo City.
Ginabuytan eon it kapulisan ro suspek ag driver it dump truck nga si Roldan Cabiluna Labajo, 45 , residente it Campo 2, Barangay Jaclupan, Talisay City.
Suno sa Toledo Police Station, bandang 7:30 it gabi-i kat matabu ro insidente sa karsadang sakop it Barangay Cambang-ug it nasambit nga siyudad.
Nagatuhaw sa imbestigasyon it kapulisan nga ginamaneho ni Labajo ro dump truck nga puno it karga nga baeas paagto sa Sitio Anislag, Barangay Canlumampao, Toledo City samtang sa likod kara ro magpamilya nga biktima sakay it motorsiklo nga paagto kunta sa Barangay Talavera, Toledo para bisitahon ro andang namatay nga ginikanan.
Ginsaysay ni Labajo, samtang nagapasaka ro truck hay gulpi eon lang nga nagkaproblema ro makina ag owa man nagkagat ro preno.
Bangud kara, naatrasan nana ro motorsiklo it mga biktima rason nga inapok ro mga raya ag naigpit ro nabdos nga naging rason it anang insigidang kamatayon.
Gindaea sa ospital ro mag-ama para sa nagakaigo nga pagbueong sa mga lastro nga naagum.
Sa kustodiya makaron it Toledo City Police Station si Labajo ag nakataeanang pasakaan it mga nagakaigo nga kaso samtang ginahueat ro desisyon it mga pamilya it biktima kun magapasugot sa settlement, kun sa siin magabayad ro suspek sa tanan nga gastos agud nga indi eon magdemanda ro mga biktima kontra kana.
