NEWS Analysis–Sang adlaw matapos ro ginpatigayon nga eleksyon, insigidang nagtuhaw ro rally it mga militanteng grupo nga ginsundan it mga pamatan-on nga estudyante sa nagkaeain-eain nga kolehiyo ag unibersidad.
Ginasinggitan nanda sa karsada ro gina alegar nga dayaan sa eleksyon.
Mataeupangdan nga haum eagi sanda bangud sa bitbit nga mga streamer ag banner.
Kadungan kara, may nagpahayag pa it ‘no classes’ sa idaeum sigon it Marcos presidency ag panawagan nga walk- out sa mga estudyante.
Pilang adlaw man nga naghimo it sangag ro nasambit nga mga pamatan-on.
Apang ro nakapukaw sa atensyon it kaabuan , sa tunga it mga naga-rally hay ro pagtuhaw it mga ina nga nagakasubo.
Nagakasubo bangud nga gina-usoy nanda ro andang naduea nga mga unga nga ginasugid nga gin-recruit agud nga maging aktibista.
Magapasimpalad nga makita nanda sa grupo it mga naga-rally ro andang mga naduea nga unga.
Suno sa sangka ina, masobra sa ap-at nga dag-on eon nana nga gina-usoy ro anang unga nga ginasugid nga gin-recruit it mga aktibista ag owa eon naka-uli sa andang baeay.
Kon nakita kunta it mga unga ro grabeng pagkabaeaka it andang mga ginikanan, kabay nga mapukaw man ro baeatyagon it mga raya .
At magtau it oras ag kahigayunan nga maipaabot sa andang mga ginikanan ag nagakabaeaka nga pamilya ro andang kahimtangan
