KALIBO, Aklan—Nagapadayun makarun ro monitoring it Highway Patrol Group (HPG) Aklan para sa hugot nga implementasyon it “no barrier, no angkas policy”.
Suno kay PSSgt. Hitler Villanueva it HPG Aklan nga sa makarun hay nakipag-coordinate eun sanda sa mga Local Government Unit (LGU) para sa pagpatuman it naga-eksister nga polisiya.
May kaangtanan kara, ginklaro ni PSSgt. Villanueva nga dapat sundon it mga motorista ro tama nga standard it barrier nga iga-install sa andang motorsiklo.
Makabig man nga unauthorize ag may nagakaigo nga violation ro magagamit it saea nga barrier.
Bawae man nga helmet ag facemask eamang ro suksok it rider ag anang backrider.
Aminado man imaw nga delikado ro pagpatakod it barrier sa motorsiklo bangud posible raya nga maging rason it aksidente.
Bangud kara, mas mayad suno pa kana nga indi eun lang magpa-angkas agud makalikaw sa peligro.
Nasayuran nga ro mag-couple eamang nga magkaibahan sa sangka panimaeay ro ginapasugtan nga magkaangkas sa motorsiklo apang kinahangean nga magpakita it mga dokumento ukon pamatuod nga sanda hay mag-asawa ukon mag-live-in partner.
Ginpahayag dugang nga ginapatuman eamang it HPG ro mandato it National Inter Agency Task Force against Covid-19 agud nga malikawan it tanan ro makataeapon nga sakit.
