KALIBO, Aklan — Arestado ro sangka tattoo artist nga sa listahan bilang No. 3 most wanted person ag high-value drug personality nga pilang buean eon nga gina-usoy bangod sa kasong may kaangtanan sa iligal nga droga ag homicide sa Sitio Tulubhan, Brgy. Manocmanoc, Boracay.
Owa eon nakapamalibad pa kat dakpon it mga operatiba it Regional Drug Enforcement Unit (RDEU) ro suspek nga si Rommel Quidato, alyas Mel-Mel, 29, residente it Veterans Village, Iloilo City.
Base sa report, ginsalakay it pulisya ro gina-upahan nga baeay it suspek matapos makumpirmang iya raya nagapanagu it may pilang buean eon bangod sa nakabinbin nga warrant of arrest sa kasong pag-eabag sa Republic Act 9165 ukon Comprehensive Dangerous Drugs Act of 2002 nga ginpaguwa ni Judge Victor Gelvezon it Regional Trial Court (RTC) Branch 36, Iloilo City.
Nadakpan sigon imaw matapos nga gin-raid ro andang boarding house sa Iloilo ku 2015 kabangdanan nga nakasuhan kaibahan ro anang live-in partner.
Owa man it gintaeana nga piyansa ro korte para sa anang temporaryong kahilwayan.
Samtang, sangka bench warrant of arrest nga ginpaguwa ku Mayo 8, 2018 ni acting presiding Judge Gemma Lyn Tarol it RTC Branch 31, Iloilo City para sa kasong homicide ro ginserbi kay Quidato.
Natabu ro insidente ku 2010 sa Barangay Esperanza, Iloilo City.
Si Quidato hay presentingt nakakulong sa Boracay Police sub-station ag nakataeanang iturn-over sa natungdan nga korte sa Iloilo City.
