KALIBO, Aklan — Gintakawan it tatlong bading ro sangka turistang Norwegian national matapos daehon it mga raya sa anang hotel room bandang alas-3:00 it kaaganhon sa Barangay Balabag, Boracay.
Suno sa biktimang si Tommy Hagerupsen, taga-Norway ag temporaryong nagadayon sa Sun Down Hotel, samtang nagapauli eon halin sa sangka bar hay ginsug-aeaw imaw it tatlong “ladyboy” ag ginsampit nga makipaghieawas ukon mag-foursome sanda.
Bangud sa karinyo ag matam-is nga mga pamisaea, napasugot sigon imaw nga daehon ro mga raya sa sueod it anang hotel room ag nakipag-inuman.
Madali sigon imaw nga nagguwa ag sa anang pagbalik hay uwa eon ro tatlo ag anang itom nga kahita nga may suoed nga masobra sa P23,000.
Ginhana pa kara nga eagson ro mga suspek, apang uwa eon kara naabutan pa.
Nagapadayon ro imbestigasyon it pulisya sa insidente kamana man ro pagtugis sa mga bading.
