KALIBO, Aklan–Nakataeanang pagabatunon it Australia ro sangka nuclear powered submarine sa idaeum it partnership sa Amerika ag United Kingdom.
Suno kay Bombo International Correspondent Denmark Suede it Sydney, Australia nga ro nasambit nga submarine hay gin-model kapareho sa next generation nuclear submarine nga design it UK nga himo it US technology.
Raya hay kilaea sa tawag nga SSN-AUKUS kasunod it makasaysayan nga partnership sa tunga it tatlong mga nasyon.
Raya hay parehong paga-obrahon ag pagagamiton it UK ag Australia.
Ginasugid nga raya ro makabig nga mabahoe nga investment it Australia sa kasaysayan agud nga mapabaskog ro andang defense capability.
Nasayuran nga pang-pitong nasyon pa eamang ro Australia nga makaangkon it nuclear attack submarine.
Apang sa pito, naga-isaeahanon ro nasambit nasyon nga owa it nuclear arms capability.
Ginatantiya nga magagastos ro Australian government it masobra sa 257 milyon US dollars ukon katumbas it 14 trilyon pesos nga pagahimuon sa sueod it 30 anyos.
Sa pihak nga parte, ginpahayag man ni Bombo International Correspondent Greg Aguilar it California , USA nga nagapangunang katuyuan sigon kara it amerika hay agud nga mapahauman ro pagpamaeag it china kontra sa Taiwan ag Indo pacific region.
Samtang, posible man suno kana nga magbukas ro Pilipinas it tatlo hasta ap-at nga military bases nga pagagamiton it US military.
Suno pa kay Aguilar nga nauna eon nga ginpahayag ni US president Joe Biden nga ro nasambit nga kauna-unahan nga proyekto hay umpisa pa eamang.
Maabu pa sigon nga mga partnerships ro matabu para sa kalinong ag seguridad it rehiyon.
