KALIBO, Aklan—Desidido eon lang nga mag-uli sa nasyon ro overseas Filipino worker (OFW) matapos nga makaexperiensiya it kabudlay sa anang pagtrabaho bilang family driver sa Saudi Arabia.
Raya hay matapos nga bukon it pabor ro Overseas Workers Welfare Office ukon OWWA sa anang kagustuhan nga boe-on imaw sa anang presenteng amo ag usuyan it bag-ong employer it anang agency sa nasambit nga nasyon.
Suno kay Gil del Rosario, residente it Brgy. Pagsangjan, Banga nga posibleng mabutang imaw sa peligro engkaso nga magbuhay pa sa anang presenteng employer bangud sa kakueangan it tueog ag pagkaon.
Nasayuran nga base sa anang reklamo, mag-eowas sa pagmaneho hay obligado man imaw nga magbugtaw it kapin sa alas-4 it aga-aga agud nga maglimpyo it ap-at nga saeakyan.
Sambilog pa nana nga problema hay ro kakueangan it pahuway bangud nga pirmeng naga-night-out ro anang babaye nga amo, kun sa siin, kon amat hay naga-abot it hasta alas-2 it aga-aga kon naga-uli.
Nagakabaeaka sigon imaw nga madisgrasya sa ginamaneho nga saeakyan bangud sa kueang it tueog.
Maskin nga gaoy hay pilit man imaw nga ginapalimpyo sa palibot it baeay.
Samtang sa pihak nga parte, ginpahayag ni Mr. Jack Arroyo it OWWA Region 6 nga indi pwede nga ro OFW ro magadikta kon gusto eon kara nga magsaylo it employer.
Haum sigon sanda nga magbulig kon ro gusto it OFW hay mag-uli sa nasyon bangud sa alegasyon kara nga ginamaltrato ukon ginapabudlayan imaw sa anang trabaho.
