KALIBO, Aklan — Nagapanawagan ro Bagong Alyansang Makabayan (BAYAN)-Aklan sa gobyerno nga ibasura eon ro Oil Derugulation Law sa tunga it serye it mabahuean nga pagtaas it presyo it produktong petrolyo ag tensyon sa Middle East.
Ginpahayag ni Kim Sin Tugna, provincial coordinator it Bayan-Aklan nga napas-eawan ro gobyerno ag ro nasambit nga laye nga maitau sa mga pumueuyu ro promisa nga panabaan ro presyo it produktong petrolyo ag langis.
Gindugang pa nga owa it nakikita nga klaru ag kongkretong bulig ro Oil Deregulation sa sektor it transport group ag basic sector rason nga dapat eon raya nga ibasura.
Raya sigon ro rason it pagtaas ag pagnaba it presyo it petrolyo sa nasyon.
Samtang, nagapanawagan man ro grupo nga boe-on eon ro P6 per liter nga excise tax sa langis ag P9 per liter nga VAT sa oil imports agud nga mabawasan ro presyo it petrolyo.
