Kalibo Aklan ——-Nagapadayun ro online transaction operations it Land Transportation Office (LTO) Aklan agud nga makalikaw sa epekto it coronavirus pandemic.
Suno kay Engr. Marlon Velez, head it LTO-Aklan nga nagapatigayon sanda it online procedures para sa office related transactions.
Kaeabanan suno kana sa andang ginabaton makaron hay ro registration transactions, renewal it drivers license, ag mga student permit nga maga expire makaron nga hunyo .
Owa pa sigon sanda nagabaton it nagabo-oe it student permit ag bag-ong drivers license .
Gindugang pa kara nga ro mga nag expired nga medical certificate hay gina-extend nanda ro validity .
Owa man sigon sanda nagasukot it penalty hasta sa Hulyo 13.
Ro mga nag expired suno kana nga lisensiya ag rehistro sa tunga it quarantine period hay extended man ro validity rason nga indi ro mga raya pwedeng dakpon .
Makaron nga sa idaeum eon it Modified General Community Quarantine ro Aklan hay nagabaton eon sigon sanda it 21 anyos panaba nga kliyente kamana man ro mga senior citizens .
Owa pa sigon sanda it petsa kon hin-uno ro full blast it andang operasyon .
Sa pihak nga parte, ginkumpirma ni Engr Velez nga ginabaton nanda ro mga gin modified nga mga motorsiklo basta nga indi raya makatuga it peligro sa kabuhi it mga nagamaneho.
Kaibahan man sigon sanda sa pagbantay sa mga pampasaherong saeakyan nga naga eabag sa social distancing.
