Uwa nagpadaea ro pilang milyon nga mga tawo nga nagpamantaw it pormal sa pagbukas it 2024 Paris Olympics. Nagdaea it mga payong ag kapote ro kaabuan para masaksihan ro makasaysayan ag kakaiba nga pagbukas it Olympics nga ginhiwat sa River Seine.
Bukon it pareho sa kinaandan nga sa mga stadium raya ginahiwat makaron hay sa River Seine. Magka-iping man sanday French President Emmanuel Macron ag International Olympic Committee (IOC) President Thomas Bach para tan-awon ro parada.
Kapareho it tradisyon hay mauna sa pagparada ro Olympic Torch nga sinundan it barko it Greece bangud idto nag-umpisa ro makasaysayang Olympics. Gaabot sa 10,500 ro atleta it Greece nga pinangunahan nanday NBA superstar Giannis Antetokounmpo ag two-time Olympian race walk Antigoni Ntrismpioti.
Pinatunog man ro lingganay sa kauna-unahang kahigayunan sa Norte-Dame de Paris Cathedral. Raya ro unang kahigayunan nga tumunog ro lingganay halin kat gintupok it kaeayo ku Abril 2019.
Nanguna man ro singer nga si Lady Gaga sa pagkanta Opening ceremony. Ginkanta nana ro “Mon truc en plumes” it iconic French artist Zizi Jeanmaire.
Sumunod man nga nagperform si 28-anyos nga singer nga si Aya Nakamura. Pila sa mga nagperform hay ro kilaeang mga modelo kun siin kilaea ro Paris sa eain-eain nga mga fashion.
