NATIONAL News —Maga-deploy ro Philippine Coast Guard (PCG) it 17,000 nga mga tawuhan agud nga masiguro ro eowas ag maayos nga pagdumdum it Semana Santa sa bilog nga nasyon.
Suno kay PCG Commandant, Admiral Ronnie Gavan, ginmanduan kara ro tanan nga mga Coast Guard units nga magpahaum para sa Oplan Biyaheng Ayos: Semana Santa 2025.
Kaibahan sa mga isyu nga iga-monitor it PCG hay ro overcrowding, overloading it mga barko, ag iba pa nga mga insidente it maritime related crimes kapareho it panakawan.
Ro mga Coast Guard rescuers hay magabulig man sa mga lifeguard sa mga tourist destination samtang ro mga responder it PCG hay magapadayon sa pagpatrolya sa kadagatan.
Nauna eon nga ginpahayag it PCG nga magapatuman sanda it heightened alert status umpisa Abril 13 hasta Abril 20 bangud sa pagdagsa it mga pasahero nga magabiyahe sa nagkaeain-eain nga probinsya makaron nga holiday.
