KALIBO, Aklan—Ginpamalibaran it Police Regional Office ukon PRO-6 ro mga napabalita nga may mga bag-ong drug groups nga naga-operate sa Western Visayas.
Suno kay P/Lt. Col. Arnel Solis, tagapaghambae it PRO-6 nga mga indibidwal player ro kaeabanan nga nadakpan makaron sa mga ginakasa nga operasyon .
Raya hay kasunod it pagka-aresto sa mga bag-ong drug suspects nga naboe-an it mga mabahoe nga volume it droga sa mga ginapatigayon nga operasyon eabi eon sa siyudad ag probinsiya it Iloilo .
Bangud sa mas ginpabaskog nga kampanya kontra sa illegal nga droga, tanan sigon nga drug enforcement units ag teams sa bilog nga region 6 hay aktibo ag insigidang gina-aksyunan ro mga impormasyon nga nagasueod.
Nagapangunang target sigon nanda makaron ro mga distributor agud nga indi eon maka-abot sa street level ro mga supply rason nga daeagkuan nga mga volume ro andang natigayon nga marekober sa mga police operations.
Madumduman nga ginakabig nga nagwakas eon ro illegal drug trade sa Western Visayas ko tiempo it Duterte administration kat mapatay ro mga kilaeang drug lords nga nakabase sa Iloilo nga si Melvin “Boyet” Odicta Sr. ag Richard Prevendido.
Umpisa Hunyo 1 hasta 22, naga abot sa P30.5-million nga balor it shabu ro narekober it PRO-6 sa kabilugan nga 176 nga anti-drug operations sa bilog nga rehiyon.
Naga-abot man sa 237 nga drug suspects ro naaresto nga nagahupot it kapin sa 4,484 grams it shabu.
Mag-eowas sa illegal drugs, ginatutukan man it PRO-6 ro kampanya kontra sa illegal gambling .
Sa kamatuoran , ginpahayag ni P/Lt. Col. Solis nga umpisa Enero hasta Mayo 2024, naga-abot sa 2,010 nga indibidwal ro nadakpan sa ginkasa nga 614 nga police operations ag nakakumpiska it 820,000 pesos nga bet money ukon taya.
Nagapadayun man suno kana ro imbestigasyon sa tatlong kapulisan nga gina-alegar nga nagabaton it payola halin sa illegal gambling.
