KALIBO, Aklan – Aminado si Department of Public Works and Highways (DPWH)-Aklan District Engineer Noel Fuentebella nga bangud sa owa pa natapos nga drainage system rason nga naexperiensiyahan ro pagbaha sa pilang lugar sa isla it Boracay.
Sa interview it Bombo Radyo kay Fuentebella, ginpahayag kara nga on-going hasta sa makaron ro andang proyekto bilang kaparte sa gihapon it rehabilitasyon sa isla.
Ginklaru pa kara nga natapos eon nanda ro Phase 1 nga ginaeakipan it road construction ag pag-ayos it drainage system apang ro naging problema eamang sigon hay owa pa sanda nakakabit sa sewer line it Tourism Infrastructure and Enterprise Zone Authority (TIEZA).
Ginpaathag ni Fuentebella nga kinahangean nanda nga maka-konekta sa TIEZA agud nga mai-flush ro tubi-uean ag baha sa andang pumping station nga derektang magaguwa sa dagat.
Angot kara, padayun sanda nga nakikipag-angot sa TIEZA agud nga mataw-an it solusyon ro nasambit nga problema sa isla
