KALIBO, Aklan — Kapin sa P20 milyon ro ginpromisang bulig pinansyal ni Senador Christopher Lawrence “Bong” Go sa anang pagbisita sa banwa it Kalibo, Huwebes it hapon.
Si Senador Go hay nakipagpueong sa mga biktimang negosyante ag vendors it nasunog nga public market nga ginpatigayon sa Magsaysay Park.
Kaibahan it senador si Aklan 1st district Congressman Carlito Marquez ag Governor Florencio Miraflores nga nakipaghinun-anon sa mga stallholders.
Personal man nga gin-agtunan it senador ro nasunog nga tindahan kon siin ginkasubo kara ro natabo bangud nga ginakabig raya nga sentro it komersyo.
Mag-eowas kara, nagtau man it bulig pinansyal ag mga groceries halin sa anang kaugalingong boesa si Sen. Go sa mga vendors nga apektado it pagkasunog it tindahan.
Ginpromisa dugang it senador nga makaangkon it Malasakit Center ro probinsya bilang one-stop-shop sa mga pumueoyong nagakinahang-ean it bulig.
Sa pihak nga parte, nagta-o man it sangkiring kalingawan ro senador sa mga nag-atendir sa pueong kaibahan ro anang mga amigo nga sanday Philip Salvador ag Robin Padilla.
Madumduman nga nasunog ro haeos 80 porsyento nga bahin it public market ko Setyembre 15 kon siin, 276 stalls ro naabo nga nagtuga it P35 milyon nga danyos.
