Nakataeana eon nga igapatuman sa maabot nga Nobyembre 16, 2023, ro dugang nga P30 sa mga pribadong obrero sa Western Visayas sa andang adlawan nga sweldo.
Raya hay matapos nga ginpabakod it National Wages and Productivity Commission (NWPC) ro Wage Order No. RBVI-27 tatlong adlaw matapos raya nga ginsumite it Regional Tripartite Wages and Productivity Boards (RTWPB) 6 ko Oktubre 16.
Suno kay Atty. Sixto Rodriguez, Regional Director it DOLE Region VI nga sabat raya sa petisyon nga ginpasaka it daywang kagrupo it mga trabahador nga nagapangayo it wage increase nga P100.00.
Apang suno sa opisyal nga P30.00 eamang per day increase ro ginpasugtan it board per classification it employees.
Raya hay nagakahueugan nga magiging P480.00 eon ro minimum wage per day.
Samtang, para sa mga may masobra sa 10 nga empleyado hay magatao it kapin sa P400.00 per day ag sa mga less than 10 hay magatao it P450.00.
Sa sektor man it agrikultura hay maging P440.00
Maga-umpisa sigon nga ipatuman raya 15-diyas matapos ro opisyal nga anunsyo it nasambit nga increase.
Nag-angkon eamang sigon makaron it sangkiri nga aberya bangud nga kinahang-ean pa raya nga i-review it National Wages and Productivity Board kung may basehan ro nasambit nga desisyon ag mayad sigon nga nacomply man ro mga requirements.
Dugang pa ni Atty. Rodriguez nga may una man sigon nga order sa mga kasambahay ag gintinguhaan man nanda nga dugangan it P500.00 ro sweldo it mga raya.
Ginpaathag kara nga antes nga makahimo it desisyon hay gintan-aw man nanda ro kapasidad ukon basehan it mga nagahinyo it wage increase ag employers.
Samtang, padumdom man nana nga ro gobyerno hay dapat nga patas ag pamatian ro parehong parte it tabahador ag mga amo.
