NATIONAL News — Nakumpiska it mga otoridad ro P42.1-million nga balor it illegal drugs halin sa sangka South African national sa Ninoy Aquino International Airport (NAIA) Terminal 3 sa Pasay City.
Suno kay PNP-Drug Enforcement Group chief Brig. Gen. Eleazar Matta natabo ro operasyon ko gabi-i it Sabado, alas 9:20 ro pang-orason.
Pahayag it opisyal, ginpatigayon nanda raya pinaagi sa pakikipagbueuligan sa mga operatiba it Intelligence Foreign and Liaison Division, ag sa mga opisyales it Philippine Drug Enforcement Agency (PDEA) ag Bureau of Customs nga na-assign sa NAIA Customs International Arrival Area it Terminal 3.
Nagresulta ro operasyon sa pagka-aresto sa 31-anyos nga eaeaki nga South African national nga may daea nga sangka itom nga luggage nga may sueod nga sangka transparent plastic pouch nga ginputos pa gid sa itom nga duct tape ag packaging tape.
Sa sueod it pouch ro puti nga crystalline substance nga ginadudahan nga shabu ag nagabug-at it 6,200 grams nga may estimated standard drug price nga P42.16 million.
Insigidang gin-inventory ag ginpadaea sa PDEA Laboratory Service ro nakumpiska nga suspected drug evidence para ipaidaeum sa analysis.
