Health News ——-Ro “bottle propping” hay nakasanayan it pilang mga ginikanan kun sa siin hay gina-aywan nga naga isaeahaon ro andang mga eapsag nga naga dede nga makabig nga masyadong delikado.
Sambilog sa pinakamabudlay nga parte it pagiging ginikanan hay ro pagpadeded sa baby – breastfeeding man ukon formula feeding.
Maabu raya nga kaibahan nga hangkat kapareho it pag-angkon it manabang milk supply ukon ro kabudlay sa pag-usoy it hiyang nga formula milk kay baby.
Mag-eowas sa mga namitlang, may mga delikado man nga aspeto sa pagpasuso.
Sambilog eon kara ro ginatawag nga “bottle propping”.
Natestingan eon baea ninyo nga itungtong ro bibiron ni baby sa mahaea ukon haboe agud nga makadede imaw samtang may gina obra ka.
Raya ro ginatawag nga bottle propping.
Kaeabanan nga gina obra raya sa mga unga nga owa pa it ikasarang nga magbuyot sa andang bibiron.
Kon indi pa masarangan nga buytan ni baby ro anang bibiron, buot hambaeon nga indi man nana raya mabo-oe kon maeunod imaw sa gatas.
Halimbawa, kara hay kon makatueog ro inyong unga ag masalim-ukan.
Delikado man ro bottle propping sa posibilidad nga maka-angkon it ear infection ro eapsag.
Kon ginapadede ro baby nga naka-eubog , naga-ilig kon amat ro gatas halin sa tutunlan paagto sa dueunggan.
Pwede man raya nga magtuga it tooth decay.
Pwedeng matipon ag mababad sa gatas ro mga ngipon it unga .
Mag-eowas kara , pwedeng ma-overfeed ro unga bangud nga indi makita ro mga hunger cues it baby, rason nga posibleng mas maabu ro anang mainom kaysa sa kinahangean nana.
Kon kinahangean nga aywan si baby maskin nga makadali eamang hay punduhon anay ro pagpadeded ukon magtawag it kabueos.
