KALIBO, Aklan—Padayon nga naka-confine sa sangka pribadong ospital sa banwa it Kalibo ro sangka padre de pamilya matapos nga nabun-an sa Brgy. Daja Sur, Banga.
Ginkilaea ni P/Staff Sgt. Elmar Relente it Banga Police Station ro biktimang si Moises Bina-uhan, 57-anyos ag nakaangkon it lastro sa tu-o nga likod matapos nga ginbuno it ginatumod nga suspek nga si Daniel David, 30-anyos ag parehong residente it nasambitang lugar.
Base sigon sa andang inisyal nga imbestigasyon, natabo ro insidente bandang alas-4:00 it hapon samtang nakipag-inuman ro biktima kay Randy Tuerez sa baeay mismo ni brgy. Kagawad Arnold Tejada.
Kaangot kara, gulpi eamang sigon nga nag-abot si David ag uwa it maskin anu nga rason kat gulpi eamang nga ginbuno kara si Bina-uhan.
Matapos ro insidente hay gilayon nga nagpaeagyo si David apang insigida man imaw nga nadakpan it pulisya sa andang panimaeay kon sa siin presente eon raya nga nakakulong sa lock up cell it Banga Police Station para sa nagakaigong disposisyon.
Samtang, ginahueat pa sigon makaron it Banga PNP ro desisyon it pamilya kon magapasaka ro mga raya it kaso kontra sa suspek.
Ro posibleng kaso nga pagaatubangon ni David hay ro frustrated murder.
