Posibleng padayunon it U.S. ag Iran ro negosasyon sa pangkalinungan matapos mapas-eawan ro nagtaliwan nga round it kasugtanan ko weekend nga nagatuyo nga wakasan ro tensyon sa Strait of Hormuz.
“You should stay there, really, because something could be happening over the next two days, and we’re more inclined to go there,” pahayag ni Trump sa sangka interview it New York Post.
Sa pihak kara, owa pa it kasiguraduhan nga petsa para sa uman nga pag-istorya.
Sa pihak it tensyon, nasayuran nga sangkiri nga nagnaba ro presyo it langis sa world market matapos ro indikasyon nga magapadayun ro diplomatic talks.
Nauna eon nga nagpatuman ro Estados Unidos it blockade sa mga pantalan it Iran bilang sabat sa pagsarado it Strait of Hormuz, sangka importanteng aeagyan it haeos 20% it global oil supply.
Suno sa U.S. Central Command, masobra sa 10,000 soldado, mga warships, ag aircraft ro idtu sa rehiyon agud nga gamiton sa andang planong operasyon.
Sa unang 24 oras, owa sigon it barkong nakaeusot sa blockade, samtang pilang merchant vessels ro napilitang magbalik sa Iranian ports.
Mag-eowas kara, nagpaandam man ro Iran nga pwedeng targeton ro mga barko it Amerika ag mga kaalyado kara, kun magapadayun ro andang operasyon samtang gintawag ro blockade nga sangka “piracy.”
Sa tunga it krisis, nagpaandam ro International Monetary Fund nga pwedeng mabutang sa peligro ro global economy ag posibleng mauli sa recession kun magpadayun ro giyera ag mataas nga presyo it krudo.
Sa pihak it grabeng tensyon ag paeag it kinagamo, nagapabilin nga bukas ro diplomatic channels sa tunga it U.S. ag Iran, ag ginaeauman nga magapadayun ro backchannel talks sa maabot nga mga inadlaw.
Samtang, nagpamalibad man ro mga kaalyado it Amerika sa NATO kapareho it Britain ag France nga magpasakop sa blockade, maskin nga haum sigon sanda nga magbulig sa pagprotekta sa Strait of Hormuz pinaagi eamang sa multilateral mission.
