KALIBO, Aklan–Owa ginaeauman it 21-anyos nga reigning Bb. Kalibo Ati-Atihan 1st runner nga si Rowan Mariz No nga ro nakahiligan nga pagpamueot it mga basura sa kaeawran umpisa nga imaw hay unga pa ro magadaea kana agud nga i-represent ro probinsiya it Aklan sa maabot nga Ms. Philippines Earth 2023.
Sa exclusive interview it Bombo Radyo Kalibo, ginpahayag ni Rowan, tubong Brgy. Pinamuk-an, New Washington nga mag-eowas sa handum nga makapasakop sa beauty pageant sa national level hay gusto man nana nga ipaabot ro anang pag-amlig ag pagpalangga sa palibot.
Pinaagi sa pagiging representante it probinsiya sa nasambit nga beauty pageant hay igapursige nana nga makaangkon it boses ag maduso ro anang adbokasiya sa pag-alaga sa palibot.
Bilang opisyal eon nga kandidata it Ms. Philippines Earth, igaduso sigon nana ro anang adbokasiya nga Marine Coastal Eco-System Preservation and Conservation.
Sa makaron hay masako si Rowan sa pagpahaum sa iba pang mga segment it contest partikular sa Q and A ag pagrampa kamana man ro photoshoot ag videoshoot.
Handum nana nga maiuli ro korona agud nga makatau it dungog sa probinsiya it Aklan.
Si Rowan hay 3rd year college student nga nagabo-oe it kursong BS Tourism Managamenrt sa sangka kolehiyo sa banwa it Kalibo.
