KALIBO, Aklan—Ginapahauman eon it lokal nga gobyerno it Malay ro uman nga pagbalik it Chinese tourists sa Isla it Boracay sa buean it Pebrero.
Suno kay Felix Delos Santos it Malay Municipal Tourism Office nga nakipag-angot eon kanda ro Chinese Embassy sa Pilipinas angot sa pag-angkon it direct flight halin sa China paagto sa Kalibo International Airport.
Bangud nga mas maabu pang Chinese tourist ro ginaeauman nga magabisita sa isla sa uman nga pagbalik it leisure travel it mga raya, ginpahayag ni Delos Santos nga ginapapahaum eon nanda ro mga tourism frontliners kamana man ro mga kinahangeanon nga logistics.
Mag-eowas kara, haum eon ro pulisya agud nga masiguro ro peace and order situation sa Boracay.
Dugang pa ni Delos Santos nga mabahoe ro naging amot it China bilang sangka major tourism source market sa Boracay eabi eon kat antes nga tumama ro pandemya.
Nasayuran nga nagapangaywa ro China sa may pinakamaabung turista sa isla kasunod it South Korea.
